ఆదిత్య హృదయ స్తోత్రమ్

తతో యుద్ధపరిశ్రాన్తం సమరే చిన్తయా స్థితమ్ ।
రావణం చాఽగ్రతో దృష్ట్వా యుద్ధాయ సముపస్థితమ్ ॥ 1 ॥
దైవతైశ్చ సమాగమ్య ద్రష్టుమ్ అభ్యాగతో రణమ్ ।
ఉపాగమ్యాఽబ్రవీ ద్రామమ్ అగస్త్యో భగవాన్ ఋషిః ॥ 2 ॥
రామ! రామ! మహాబాహో! శృణు గుహ్యం సనాతనమ్ ।
యేన సర్వాన్ అరీన్ వత్స! సమరే విజయిష్యసి ॥ 3 ॥
ఆదిత్యహృదయం పుణ్యం సర్వశత్రువినాశనమ్ ।
జయాఽఽవహం జపేన్నిత్యమ్ అక్షయ్యం పరమం శివమ్ ॥ 4 ॥
సర్వమఙ్గళమాఙ్గళ్యం సర్వపాపప్రణాశనమ్ ।
చిన్తాశోకప్రశమనమ్ ఆయుర్వర్ధన ముత్తమమ్ ॥ 5 ॥
రశ్మిమన్తం సముద్యన్తం దేవాసురనమస్కృతమ్ ।
పూజయస్వ వివస్వన్తం భాస్కరం భువనేశ్వరమ్ ॥ 6 ॥
సర్వదేవాత్మకో హ్యేష తేజస్వీ రశ్మిభావనః ।
ఏష దేవాసురగణాన్ లోకాన్ పాతి గభస్తిభిః ॥ 7 ॥
ఏష బ్రహ్మా చ విష్ణుశ్చ శివః స్కన్దః ప్రజాపతిః ।
మహేన్ద్రో ధనదః కాలో యమః సోమో హ్యపామ్పతిః ॥ 8 ॥
పితరో వసవః సాధ్యాహ్యశ్వినౌ మరుతో మనుః ।
వాయుర్వహ్నిః ప్రజాప్రాణ ఋతుకర్తా ప్రభాకరః ॥ 9 ॥
ఆదిత్యః సవితా సూర్యః ఖగః పూషా గభస్తిమాన్ ।
సువర్ణసదృశో భానుః హిరణ్యరేతా దివాకరః ॥ 10 ॥
హరిదశ్వః సహస్రార్చిః సప్తసప్తిర్మరీచిమాన్ ।
తిమిరోన్మథనః శమ్భుః త్వష్టా మార్తాణ్డ అంశుమాన్ ॥ 11 ॥
హిరణ్యగర్భః శిశిరః తపనో భాస్కరో రవిః ।
అగ్నిగర్భోఽదితేః పుత్త్రః శఙ్ఖః శిశిరనాశనః ॥ 12 ॥
వ్యోమనాథస్తమోభేదీ ఋగ్యజుః సామపారగః ।
ఘనవృష్టిరపాంమిత్రో విన్ధ్యవీథీప్లవఙ్గమః ॥ 13 ॥
ఆతపీ మణ్డలీ మృత్యుః పిఙ్గళః సర్వతాపనః ।
కవిర్విశ్వో మహాతేజా రక్తః సర్వభవోద్భవః ॥ 14 ॥
నక్షత్రగ్రహతారాణామ్ అధిపో విశ్వభావనః ।
తేజసామపితేజస్వీ ద్వాదశాత్మన్ నమోఽస్తుతే ॥ 15 ॥
నమః పూర్వాయ గిరయే పశ్చిమే గిరయే నమః ।
జ్యోతిర్గణానాం పతయే దినాఽధిపతయే నమః ॥ 16 ॥
జయాయ జయభద్రాయ హర్యశ్వాయ నమో నమః ।
నమో నమః సహస్రాంశో! ఆదిత్యాత నమో నమః ॥ 17 ॥
నమః ఉగ్రాయ వీరాయ సారఙ్గాయ నమో నమః ।
నమః పద్మప్రబోధాయ మార్తాణ్డాయ నమో నమః ॥ 18 ॥
బ్రహ్మేశానాఽచ్యుతేశాయ సూర్యాయాఽఽదిత్యవర్చసే ।
భాస్వతే సర్వభక్షాయ రౌద్రాయ వపుషే నమః ॥ 19 ॥
తమోఘ్నాయ హిమఘ్నాయ శత్రుఘ్నాయాఽమితాత్మనే ।
కృతఘ్నఘ్నాయ దేవాయ జ్యోతిషాం పతయే నమః ॥ 20 ॥
తప్తచామీ కరాఽఽభాయ వహ్నయే విశ్వకర్మణే ।
నమస్తమోఽభినిఘ్నాయ రుచయే లోకసాక్షిణే ॥ 21 ॥
నాశయత్యేష వై భూతం తదేవ సృజతి ప్రభుః ।
పాయత్యేష తపత్యేష వర్షత్యేష గభస్తిభిః ॥ 22 ॥
ఏష సుప్తేషు జాగర్తి భూతేషు పరినిష్ఠితః ।
ఏష చైవాగ్నిహోత్రం చ ఫలం చైవాఽగ్నిహోత్రిణామ్ ॥ 23 ॥
వేదాశ్చ క్రతవశ్చైవ క్రతూనాం ఫలమేవ చ ।
యాని కృత్యాని లోకేషు సర్వ ఏష రవిః ప్రభుః ॥ 24 ॥
ఏనమాపత్సు కృచ్ఛ్రేషు కాన్తారేషు భయేషు చ ।
కీర్తయన్ పురుషః కశ్చిత్ నాఽవసీదతి రాఘవ ॥ 25 ॥
పూజయస్వైనమేకాగ్రో దేవదేవం జగత్పతిమ్ ।
ఏతత్త్రిగుణితం జప్త్వా యుద్ధేషు విజయిష్యసి ॥ 26 ॥
అస్మిన్ క్షణే మహాబాహో! రావణం త్వం వధీష్యసి ।
ఏవముక్త్వా తదాఽగస్త్యో జగామ చ యథాగతమ్ ॥ 27 ॥
ఏతచ్ఛ్రుత్వా మహాతేజా నష్టశోకోఽభవత్ తదా ।
ధారయామాస సుప్రీతో రాఘవః ప్రయతాఽఽత్మవాన్ ॥ 28 ॥
ఆదిత్యం ప్రేక్ష్య జప్త్వా తు పరం హర్షమ్ అవాప్తవాన్ ।
త్రిరాచమ్య శుచిర్భూత్వా ధనురాదాయ వీర్యవాన్ ॥ 29 ॥
రావణం ప్రేక్ష్య హృష్టాత్మా యుద్ధాయ సముపాగమత్ ।
సర్వయత్నేన మహతా వధే తస్య ధృతోఽభవత్ ॥ 30 ॥
అథ రవిరవదన్ నిరీక్ష్యం రామం
     ముదితమనాః పరమం ప్రహృష్యమాణః ।
నిశిచరపతిసంక్షయం విదిత్వా
     సురగణమధ్యగతో వచస్త్వరేతి ॥ 31 ॥

ఇత్యార్షే శ్రీమద్రామాయణే వాల్మీకీయే ఆదికావ్యే యుద్ధకాణ్డే సప్తోత్తరశతతమః సర్గః